Flatcoated Retriever

Banderas

Forever Sunshine Banderas is Born for us

 

18. Juli 2007 - 27. September 2017


Wenn ich auch gegangen bin, sollt ihr wissen, dass ich weiterlebe.
Wenn ihr mich braucht, so flüstert meinen Namen in euren Herzen,
ganz leise und ich werde da sein.

 

Von Katharina, für ihren geliebten Banderas:

Am Englerwäg ds Meiringe

Vor 10 Jahr: Es isch o September gsi, September 2007, won i Di bi cho hole bi dr Rosmarie. Sie het mir eine vo ihrne Sunneschiin us em B-Wurf avertrout. Banderas han i Di touft. Nid numme Di Name isch speziell u einzigartig gsi, nei o Du bisch e spezielle gsi vo Afang a....hesch Locke gha, mi hät nid chönne meine Du sigsch e Fläti.

Mier si zämä uf e unbekannti Reiis gange. Zersch han i Dir viel bibracht, später han i vo Dir dörfe lehre. Du bisch e ungloublich fiine, liebevolle, gnüegsame u geduldige Hund gsi.
Du hesch nie viel gforderet, bisch geng öppe zrugg gstande, damit es Dine Kollege guet geit.

Dr Jimmy hesch du eifach so agno, hesch ihm zeigt, was Rächt u Ordnig isch. Hesch ihm e Halt gäh und er het dür Di Vertroue gwunne u e zweiti Chance i sim Läbä übercho.
Mit mier bisch Du dür alli Höche u Tiefe gange. Bisch ruehig a minere Siite gsi. O mier hesch mengisch e Halt gäh, wenn i denkt ha, dass grad alles schief louft.
Vor 10 Monet: I ha es Schätzi gfunde im Bärner Oberland. Du hesch Di mit mier gfröit u mir uf Dini Art zeigt, dass es Dir hie sehr gut gfallt, dass Du wohl bisch i dr nöie Familie. Mier si alli zämä uf grossi Wanderschafte gange, hei Bärgtoure gmacht u Dis Fläti-Härz het öppe eis e riese Gump gno vor Fröid. Du u dr Jimmy hei no e Hunde-Dame übercho u das het ds Rudel komplett gmacht. Mier hei üs mengisch gfrägt, wär äch dr Rudel-Chef sig. D Antwort hei mier ersch jetz übercho. Du bisch dr Chef gsi, hesch es aber nie müesse demonstriere. Du hesch mit Dinere unendliche Fröid, guete Luune u dim ufgstellte Wäse, die andere zwei agsteckt u mitzoge. Sie vermisse Di.

Die letschte 10 Wuche: Mini Chrankheit won i ha müesse dürläbä, macht für mi hüt Sinn. Es het mir ermöglichet, dass i die letschte 10 Wuche, vom Morge bis am Abe,mit Dir ha dörfe verbringe. O da hesch du mi motiviert, zum gah loufe u uf em Spazierwäg nid dr Chopf la ds hange, sondern mit Dir ds spiele, di ds beschäftige u das het mir gholfe, dass i nid in es Loch gheit bi. I üsne letschte 10 Wuche isch ungloublich viel passiert. Vieles het sich für mi klärt, han e nöie Job gfunde u schlussendlich hei mir alli entschiede, dass mier für immer i ds Bärner Oberland zügle.............
Du, mi liebe Buzzel, hesch mi o i dene Wuche fescht begleitet, aber am Mittwuch isch dini Reiis mit mier ds End gange. Du hesch wohl dini Ufgab erlediget. Es isch unfassbar, dass Du nümme da bisch. Am Morge si mir losgloufe wie geng, aber Du hesch nümme wölle hei cho, bisch eifach zämägheit u hesch mir zeigt, dass Du nümme magsch.....
O wenn i mier geng gwünscht ha, dass Du eis genau so darfsch gah, si üseri Härz voller Truur. Du hesch e grossi Lücke hinderlah. Keine chunnt am Morge cho ds Cafetassli usschläcke, niemmer fröit sich so sehr wie Du, dass mier am Morge, wenn es no dunkel isch, gäh gah loufe, keine hilft mir Sache d Stägä uftrage, keine verzellt Gschichte, wenn mir die nasse Pfötli tröchne u keine zeigt mir, i weller Schublade d Gutzi si....Es isch still worde.

Wenn mir Dir ganz nach wei si, will dr Schmärz grad ganz gross isch, chömme mir a dä Ort zrugg, wo Du über d Rägäbogebrügg gange bisch: A Englerwäg ds Meiringe.
Mir vermisse Di u du wirsch töif i üsne Härze wiiterläbe.

Katharina, Sonja, Jimmy u Nala

 

 

„Es gibt Engel, die dürfen bei uns auf der Erde bleiben bis sie ihre Flügel bekommen. Sie haben 4 Pfoten, eine schwarze Lakriz-Nase, manchmal Fledermausohren und den treusten Blick, den man sich vorstellen kann. Und bis diese Engel ihre Flügel bekommen, nennt man sie HUNDE“.

Danke Katharina, dass du unserem Sonnenschein viele Jahre lang ein liebevolles Zuhause und ein ausgefülltes Hundeleben ermöglicht hast. Banderas wird in unseren Herzen immer einen grossen Platz einnehmen.

 






(C) 2015 - Alle Rechte vorbehalten  |  

Urheberrechte, Datenschutz und Haftungsausschluss

  |